صبيعات البطاطا بالكفتة و الفرماج

لغزالات
كيف صبحتو
دابا غادي نحط ليكم وصفة ديال صبيعات بطاطا بالكفتة و الفرماج
سمحولي ما صورتش المراحل
ماتخافوش كاين صورة الطبق النهائي
و الطريقة ما صعيباش
و كتجي بنييييينة


ندخلو لمعقول ههههه نخليكم مع الطريقة

غادي نحتاجو 3 حبات بطاطا
4 بيضات مسلوقين
5 فرماجات لا فاش كي غي ولا اي نوع اخر
2 بصيلات
رابعة كفتة
لا شابليغ (الى ما عندكش ممكن تاخدي شوية خبز ديال الدار سخنيه فالفراحة و خلية يبرد حتى يقساح و حكيه فالحكاكة حتى يولي باودر)
بيضة خضرة

سلقي البطاطا مع مليحة و شوية بزار و صفيها
شحري البصلة فمقلة و زيدي عليها الكفتة و خليهم يتقلاو مع التوابل(حسب الذوق ) و الملح
قشري البيض المسلوق و حكيه
دعكي البطاطا المسلوقة بالفورشيط و زيدي عليها البيض المحكوك و خلطيهم مزيان
ديري كويرات بخايط البطاطا و البيض
خدي كويرة و حطيها فيدك سرحيها شوية و حطي وسطها شوية الكفتة و طريف فرماج
و سدي عليها من الجناب بصباعك حتي مايبقاش يبان داكشي لي لداخل
و بلبليها فيدك باش تسد مزيان و تجي على شكل صبيعات
من بعد ضربي البيضة و حطي فيها الصبيعات حتى يتغطاو بالبيض
و مرمديهم ف لا شابليغ ولا مسحوق الخبز
و قليهم فالزيت
و بالصحة و الراحة
ما تبخلوش عليا بدعاويكم و ردودكم




[ندعوك للتسجيل في المنتدى أو التعريف بنفسك لمعاينة هذه الصورة]




شفتها في واحد المنتدى
و حبيت نشاركم بيها